OPAC - Guide

• Ricercje semplice
• Ricercje avanzade
• Ricercje par Listis
• Ricercjis speciâls
• Aree utents
• Bibliotechis
• Glossari

La "Ricercje semplice" e permet di fâ une ricercje bibliografiche doprant nome un cjamp di test. Chest cjamp al cîr in modalitât componude in ducj i cjamps de schede bibliografiche (Titul e sottitul, Responsabilitât, Autôr, Editôr, Sogjet, Thesaurus, Peraule clâf, Classificazion, Notis e Abstract, Dâts di inventari).

La ricercje semplice e je un imprest util cuant che no si sa ben ce criteri doprâ par fâ une ricercje.

Il criteri di ricercje aplicât al met adun dutis lis strichis inseridis midiant dal operadôr logjic “AND”.
La ricercje, duncje, e ven fate doprant un criteri componût che si pues descrivi in maniere sintetiche cussì:

Si à di dî che, se ben che la ricercje midiant di chest cjamp gjenerâl e je facile, no garantìs un risultât precîs e no je rapide.
Une ricercje di cheste fate e pues jessi “rumorose”, tal sens che e pues fâ saltâ fûr risultâts che no àn nuie ce fâ cun ce che si cîr.
Dut câs, e pues fâ saltâ fûr risultâts interessants che al sarès dificil cjatâ in altris manieris.

Lis funzions disponibilis in cheste pagjine a son:

• Selezion de Biblioteche o Bibliotechis dulà che si à di cirî
  Midiant de selezion, ancje multiple, des sot-Bibliotechis che a fasin part dal sisteme tal câs di un catalic di un sisteme bibliotecari.
• Scancele
  Scancele il contignût de mascare.
• Cîr
  Fâs la ricercje te base di dâts, se la mascare no je vueide. Oltri che cul mouse, cheste funzion si ative ancje cu la tastiere, doprant il tast Enter.

La ricercje avanzade e permet di otignî risultâts une vore precîs midiant de cumbinazion di plui di un cjamp di ricercje.

Te mascare di pueste si pues scrivi un criteri di ricercje componût cumbinant, midiant di operadôrs logjics, un, doi o trê criteris.
Par ogni criteri a son disponibii:

• un menù a tindine dulà che si pues sielzi un canâl di ricercje
• un cjamp di test dulà che si à di scrivi la peraule che si vûl cirî tal canâl selezionât
• un menù a tindine dulà che si pues sielzi  la modalitât di ricercje de peraule inseride
      - Peraulis (dutis): al cjate dutis lis notiziis bibliografichis che a àn dentri dutis cuantis lis peraulis che si cirin;
      - Peraulis (almancul une): al cjate dutis lis notiziis bibliografichis che a àn dentri almancul une des peraulis che si cirin;
      - Frase esate: al cjate dutis lis notiziis bibliografichis dulà che dutis lis peraulis scritis tal cjamp a son une daûr chê altre, tal stes ordin che a son stadis scritis
• un menù a tindine dulà che si pues sielzi un operadôr logjic par cumbinâ il criteri cun chel dopo (dome pai prins doi criteris)

Oltri ai singui criteris, l’utent al pues doprâ une serie di filtris, in particolâr:

• An di publicazion (dal an X al an Y)
• Nature o Nivel bibliografic (Monografie, Periodic...)
• Forme (Materiâl testuâl, Materiâl musicâl...)
• Supuart o tipologjie di document (Test a stampe, Manuscrit, Risorse eletroniche...)
• Paîs di publicazion
• Lenghe di publicazion

• Biblioteche (selezion di dutis lis bibliotechis, di cualchi biblioteche o dome di une biblioteche dal sisteme)

I risultâts de ricercje a cjapin dentri lis notiziis che a van daûr dal criteri che si à stabilît e dai filtris che si à doprât.

Lis funzions disponibilis in cheste pagjine a son:

• Scancele
  Scancele il contignût di ducj i cjamps de mascare.
• Cîr
  Fâs la ricercje te base di dâts. Oltri che cul mouse, cheste funzion si ative ancje cu la tastiere, doprant il tast Enter.

LI barcons pe scansion dai indiçs a àn un cjamp di test là che si à di scrivi la peraule che si vûl cirî tal indiç.

A son disponibilis dôs funzions:

• Cîr
  Fâs la ricercje tal indiç che al è stât sielzût. Oltri che cul mouse, cheste funzion si ative ancje cu la tastiere, doprant il tast Enter.
• Scancele
  Scancele il contignût dal cjamp di test.

Il risultât de ricercje al è la liste des peraulis che a son tal indiç e che a scomencin cui caratars che al à scrit l’utent.

L’opac al permet di fâ la scansion di chescj indiçs:

• Titui
• Autôrs
• Sogjets
• Colezions
• Classificazions
• Editôrs
• Marcjis tipografichis
• Clâfs personalizadis
• Personalizadis (Dedicatari, Possessôr, Altris listis personalizadis...)
  

Lis ricercjis semplicis e avanzadis che a son metudis a disposizion dal opac no permetin di doprâ ducj i canâi che a son tal catalic.
Par cumò a son a disposizion chestis ricercjis speciâls:

• libri moderni
• libri antîc
• materiâl musicâl
• materiâl cartografic
• materiâl grafic
• materiâl filmic
• navigadôr Dewey
• Thesaurus
• Descritôrs
• Periodics

Dutis lis ricercjis speciâls a permetin di fâ ricercjis midiant di canâi specifics. Cualchidun di chescj canâi specifics nol è a disposizion ta chês altris mascaris di ricercje o ben selezionant diretamentri su ciertis naturis, formis, supuarts (par esempli libri moderni, libri antîc, materiâl musicâl, cartografic, filmic) o modalitâts di ricercje particolârs (par esempli Navigadôr Dewey, Thesaurus, Descritôrs).

Par ogni tipologjie di ricercje, l’utent al à a disposizion mascaris che i permetin di fâ ricercjis doprant canâi specifics.

I utents iscrits al sisteme che a àn domandât e ricevût i dâts che a coventin par autenticâsi, a puedin doprâ la aree utents.

La aree utents e je dividude in chestis sezions:

• Login
 
• Profîl
• Circolazion
• Propuestis di libris di comprâ
• I miei libris
• Lis mês ricercjis
• Ricercjis fatis
• Documents domandâts
  

Profîl utent

Tal barcon "Profîl utent" si pues viodi la configurazion atuâl dal utent. In chest barcon si pues viodi:

• Non dal utent
• Status dal utent (gjeneric, privilegjât, ...)
• Password vecje
• Password gnove
• Conferme de password (se si vûl cambiâ la password)
• Notifichis (ativazion facoltative dal servizi che al mande in maniere automatiche lis notifichis midiant di e-mail)

Circolazion

Tal barcon "Circolazion utent" si puedin viodi dutis lis operazions di circolazion dal utent.
In chest barcon si pues viodi:

• Barcon a dissese Visualize: (Prenotazions, Prestits in cors, Storic, Consultazions, Domandis Interbibliotecari...)
  Di chest barcon a dissese si pues sielzi il filtri che si vûl doprâ par viodi lis operazions di circolazion.
  
• Ordin par: (Inizi: in cressi o in calâ, Titul: in cressi o in calâ)
• Numar di riis che si vûl viodi te liste.

Cul boton Visualize si pues viodi une liste di operazions che a àn dentri: Titul, Inizi operazion, scjadince operazion, Fin operazion.

 

Propuestis di libris di comprâ

Tal barcon "Propuestis di libris di comprâ" si pues proponi di comprâ monografiis e di abonâsi a periodics.
La propueste e ven valutade e, se e ven fate buine, si mande un avîs a cui che le à fate. L’avîs al ven mandât par pueste eletroniche e/o in cheste sezion dal sît.
Par proponi di comprâ un libri, si àn di scrivi chestis informazions:

• Titul (cjamp obligatori)
• Autôr
• Editôr
• An di edizion
• ISBN
• Biblioteche (cjamp a dissese)
• Motîf de propueste (scuele, esams, interès personâl, concors...)
• Notis

 

I miei libris

Te liste bibliografiche che si clame "I miei libris" e je une liste di schedis che a puedin jessi visualizadis in forme analitiche. E je une sorte di bibliografie che l’utent al met adun in diviersis sessions di ricercje. Cuant che al à cjatât lis schedis che i interessin, l’utent al pues salvâlis te sô aree utent.

A partî de liste, si puedin tornâ a viodi lis listis dai risultâts des ricercjis fasint clic sul leam dal criteri di ricercje.
In chest barcon si puedin ancje eliminâ in maniere seletive lis ricercjis che a jerin za stadis salvadis.

 

Lis mês ricercjis

Midiant dal barcon "Lis mês ricercjis" si puedin salvâ lis ricercjis che si fasin. Cuant che si salve une ricercje che si à fat, si pues tornâ a fâle compagne. La liste des ricercjis salvadis e mostre dutis lis ricercjis che l’utent al à salvât e, par ognidune di lôr, e mostre chestis informazions:

• Non de ricercje
• Numar di records cjatâts la ultime volte che la ricercje e je stade fate
• Date che la ricercje e je stade fate
• Descrizion dai criteris di ricercje
• Liste di catalics dulà che e je stade fate la ricercje (Bibliotechis)

Se al selezione il non de ricercje, l’utent le torne a fâ e, duncje, si vierç une pagjine che e mostre i  risultâts sintetics.


In chest barcon si puedin ancje eliminâ in maniere seletive lis ricercjis che a jerin za stadis salvadis.
Si à di visâsi che cheste funzion e je disponibile nome pai utents regjistrâts.

 

Ricercjis fatis

Ta chest barcon a vegnin ripuartadis dutis lis ricercjis che un utent gjeneric (cence Login) al à fat te session di lavôr.
La liste des ricercjis e mostre chestis informazions:

• numar di ordin de operazion di ricercje
• criteri di ricercje che al è stât doprât
• Biblioteche di apartignince
• numar di notiziis bibliografichis che a àn dât une rispueste par ogni ricercje
• comant Salve par memorizâ la ricercje te aree utent (nome pai utents che a àn fat il Login).

A partî des listis, si puedin tornâ a viodi lis listis dai risultâts des ricercjis fasint clic sul leam dal criteri di ricercje.

 

Documents domandâts

La guide no je disponibile...

Torne al indiç ^
Biblioteche

Tal barcon "Bibliotechis" si puedin viodi lis informazions istituzionâls e statistichis su la Biblioteche (o su lis Bibliotechis tal câs di un sisteme bibliotecari) che a fasin riferiment al opac in cuistion.

La liste des Bibliotechis e à dentri chestis informazions:

• Codiç de Biblioteche (4 caratars)
• Non de Biblioteche
• Numar di schedis bibliografichis che a son tal catalic
• Date dal ultin inzornament
• Boton Novitâts che al permet di viodi la liste des schedis des novitâts

Fasint clic sul non di ogni Biblioteche de liste, si puedin viodi in detai chestis informazions:

• Informazions (non de Biblioteche, direzion di pueste, numar telefonic, pagjine web e pueste eletroniche)
• Orari (tabele cui oraris che la biblioteche e je vierte al public)
• Statistichis (dâts di catalic plui impuartants: N. schedis e N. volums)
Torne al indiç ^

 

 

GLOSSARI

Canâi, tiermins, criteris

Par solit, intun catalic bibliografic informatizât, si puedin fâ lis ricercjis doprant dome une part dai cjamps che formin une notizie bibliografiche. Chescj cjamps a vegnin clamâts “canâi di ricercje” e a son diferents di un catalic a chel altri, secont lis finalitâts che al à ogni catalic.
A vegnin clamâts ancje “ponts di acès” (che e je la definizion che e ven doprade tai standards internazionâi dal setôr)


La plui part dai catalics bibliografics e permet di doprâ almancul chescj canâi:

• Titul
• Autôr
• Sogjet
• An di publicazion
  

Par inviâ une ricercje, nol baste nome indicâ dulà che si vûl cirî alc, ma si à di dî ancje ce che si vûl cirî.
Vâl a dî che si à di definî un tiermin di ricercje. Un criteri di ricercje al è formât propit de associazion tra un tiermin di ricercje e un canâl.

Par esempli, un criteri di ricercje avonde sempliç al podarès jessi chel chi:


titul = olmis
in chest câs il canâl al è Titul e il tiermin di ricercje al è “fabriche”.
Un altri esempli al è chest chi:
Autôr = Beline
in chest câs il canâl al è Autôr e il tiermin al è “Beline”.
Dispès i tiermins di ricercje che a jentrin intun criteri a son plui di un, come in chest esempli chi:
Titul = Cirint lis olmis di Diu

In câs come chest, se un catalic lu permet, si pues ancje specificâ cemût che a àn di jessi interpretâts i tiermins di ricercje (par esempli, dutis lis peraulis, almancul une peraule, frase esate e vie indevant)

I criteris elementârs (ven a stâi come chei che si à mostrât cumò) a puedin jessi metûts adun midiant di operadôrs logjics. Il risultât al è un criteri componût.

Cualchi canâl di ricercje al pues jessi doprât nome par creâ criteris componûts. I canâi di cheste fate particolâr a vegnin clamâts filtris.

 

Struture dai tiermins di ricercje


Se un catalic lu permet, un criteri di ricercje al pues jessi creât specificant no nome un canâl e un tiermin, ma ancje la modalitât di ricercje dal tiermin in cuistion.
La modalitât di ricercje e dîs cemût che si à di interpretâ la secuence des peraulis che a formin il tiermin. Lis pussibilitâts, par solit, a  son trê:

• Peraulis (almancul une). Il criteri al è verificât di dutis lis notiziis là che, pal canâl specificât, e je almancul une des peraulis che a formin il tiermin di ricercje.

Par esempli, il criteri Titul = “lenghe furlane” al è verificât di chescj titui:
Gramatiche pratiche de lenghe furlane
Cors pratic di lenghe e culture furlane
La societât furlane tal secul XIX
Cors di lenghe par fruts



In chest câs, l’ordin des peraulis nol è rilevant.

• Peraulis (dutis). Il criteri al è verificât di dutis lis notiziis, là che, pal canâl specificât, a son dutis lis peraulis che a formin il tiermin di ricercje.

Par esempli, il criteri Titul = “lenghe furlane” cu la modalitât Peraulis (dutis) al verificât di chescj titui: Gramatiche pratiche de lenghe furlane
Cors pratic di lenghe e culture furlane



Ancje in chest câs, l’ordin des peraulis nol è rilevant.

• Frase esate. Il criteri al è verificât di dutis lis notiziis là che, pal canâl specificât, lis peraulis che a formin il tiermin di ricercje a son dutis e tal stes ordin che a son stadis scritis.
  

Par esempli, il criteri Titul = “lenghe furlane” cu la modalitât Frase esate al è verificât di chest titul: Gramatiche pratiche de lenghe furlane


 

Operadôrs logjics

Une vore di catalics i dan al utent la pussibilitât di meti adun plui di un criteri midiant di operadôrs logjics, come “e” (AND), “o” (OR).


 

Torne al indiç ^